কুইজ(QUIZ)ৰ বিষয়ে

কুইজ (QUIZ) বর্তমান প্ৰতিযোগিতাৰ যুগত এক জনপ্ৰিয় তথা সর্বজনবিদিত প্ৰতিযোগিতা। বর্তমান সময়ত বিভিন্ন বাতৰি কাকত, আলোচনী, ৰেডিঅ'- টেলিভিচন, বিদ্যালয়, মহাবিদ্যালয়, বিশ্ববিদ্যালয় আদি সকলোতে এই কুইজে দ্ৰুতগতিত অসাধাৰণত্বৰে বিস্তৃতি লাভ কৰিবলৈ সক্ষম হৈছে। সুতীক্ষ্ন স্মৃতিশক্তি তথা জ্ঞানৰ দ্ৰুত প্ৰক্ৰিয়াৰ প্ৰদর্শন হোৱা এই কুইজ বিভিন্ন মাধ্যমৰ প্ৰচাৰৰ ফলত এক গুৰুত্বপূর্ণ প্ৰতিযোগিতাত পৰিণত হৈছে।

কুইজৰ (QUIZ) ইতিহাস→

কিন্তু আপুনি জানেনে বর্তমানৰ এই জনপ্ৰিয় প্ৰতিযোগিতাখনিৰ আৰতো লুকাই আছে এক জনপ্ৰিয় ইতিহাস। ১৮৫০-৬০ চনৰ পূর্বৰ কথা এয়া। সেই সময়ৰ ইংলেণ্ডৰ আয়াৰলেণ্ডৰ ৰাজধানী চহৰ ডাবলিন মহানগৰীত এটা ঘটনা ঘটিছিল। ডাবলিন চহৰখন আছিল অভিনয় তথা ৰংগমঞ্চৰ বাবে বিখ্যাত। এইখন চহৰৰে এখন ৰংগমঞ্চৰ এজন মেনেজাৰে এদিন হঠাৎ বাজি লগাইছিল যে যদি তেওঁ ইচ্ছা কৰে তেন্তে ২৪ ঘণ্টাৰ ভিতৰতে এটা নতুন শব্দ ইংৰাজী ভাষাত প্ৰচলন কৰি দিব পাৰে। এনেদৰে বাজি ৰাখি তেওঁ সেইদিনা ওৰেটো ৰাতি ডাবলিন চহৰৰ বেৰবোৰত এটা শব্দ লিখি পেলালে। সেই শব্দটোৱে হ'ল - QUIZ. পিছদিনা সকলোৰে মুখে মুখে উচ্চাৰিত হৈ বিয়পি পৰিল এটা নতুন অদ্ভুত শব্দ QUIZ. কিন্তু কোনেও ইয়াৰ অর্থ বুজিও নাপালে আৰু উলিয়াব নোৱাৰিলে।
সেই তেতিয়াৰ পৰাই লাহে লাহে মানুহে ভাল পোৱা অথচ নজনা কিছুমান কথা জানিবলৈ থকা ইচ্ছুকতাখিনিক লৈয়ে জন্ম হ'ল এই কুইজ শব্দটিৰ।

এনেদৰে বহুদিন পূর্বে কোনো এজনে ধেমালিতে সৃষ্টি কৰা এই কুইজ (QUIZ ) বর্তমান সময়ৰ এক অন্যতম জনপ্ৰিয় তথা জনসমাদৃত প্ৰতিযোগিতা। বর্তমান সময়ত কুইজ হ'ল এক মানসিক খেল। প্ৰকৃত অর্থত কবলৈ গলে এই কুইজৰ অর্থ হ'ল বিনোদন মাজেৰে নিজৰ জ্ঞান আৰু বুদ্ধিমত্তাৰ উৎকর্ষ সাধন। সেয়ে বহুজনে ইয়াক ইংৰাজীত INFOTAINMENT বুলিও কব খোজে। ইংৰাজী INFORMATION আৰু ENTERTAINMENT লগ লাগি গঠিত হৈছে এই শব্দ। অর্থাৎ মনোৰঞ্জনৰ মাজেৰে জ্ঞানৰ সন্ধান।
এনেদৰে বর্তমান জ্ঞান, আনন্দ আৰু বিনোদনৰ এক অন্যতম জনপ্ৰিয় প্ৰতিযোগিতা হ'ল কুইজ।

উৎস → বিভিন্ন ক্ষেত্ৰ।